
马尔巴大师教言集MARPA4རྡོ་རྗེ་འཆང་ཏཻ་ལོ་པ་དང་ནཱ་རོ་ཡེ་ཤེས་དངོས་གྲུབ་ཀྱི་རྣམ་མགུར།
1-1-39a
༄༅། །རྡོ་རྗེ་འཆང་ཏཻ་ལོ་པ་དང་ནཱ་རོ་ཡེ་ཤེས་དངོས་གྲུབ་ཀྱི་རྣམ་མགུར།
༄། །རྗེ་བཙུན་ཏེ་ལོ་པས། དཔལ་ནཱ་རོ་པ་ལ་བླ་མ་མཚན་ཉིད་
1-1-39b
དང་ལྡན་པར་བསྟེན་དགོས་པར་གསུངས་པ། ས་གཞི་བཟང་པོ་དག་ནི་ཐུན་མོང་ལ། །བློ་དམན་རྣམས་ཀྱིས་ལས་ལ་མ་ཞུགས་ཤིང་། །སྡུག་བསྔལ་ནད་ཀྱིས་གཟིར་བ་བསལ་བྱའི་ཕྱིར། །དེད་དཔོན་ལྟ་བུ་དག་ནི་སེམས་བསྐྱེད་བྱེད། །མུ་ཏིག་ཆུན་དཔྱངས་ཆེན་པོ་བཟུང་བྱེད་ཅིང་། །འབྱུང་བ་ས་ཆུ་མེ་རླུང་དབང་དུ་བསྡུད། །རྒྱ་མཚོ་ཆེན་པོ་བཞི་ནས་རིན་ཆེན་བདག །སྦྲང་རྩི་བཅུད་ནི་མར་གྱི་སྙིང་པོར་ལྡན། །གོམས་པར་བྱས་ཤིང་བཟོ་ལ་བྱང་བར་བྱེད། །ཕྱེ་མ་ལེབ་དང་རི་དགས་བུང་བ་དང་། །ཉ་དང་གླང་ཆེན་དག་ལས་རབ་ཏུ་གྲོལ། །དུག་མདས་མ་ཕོག་ཕོག་ཀྱང་སླར་གསོ་ཞིང་། །ཐར་རྒོད་ཆུ་ཡིས་རབ་ཏུ་བངས་པར་གནས། །རབ་ཏུ་ནོར་མང་ཕྱུག་ཅིང་ཤིན་ཏུ་ཕྱུག །ཞིང་པའི་ལས་ལ་རབ་ཏུ་གོམས་པར་ཞུགས། །མ་ཡིས་བུ་ནི་རབ་ཏུ་སྨིན་པར་བྱེད། །འཇོམས་བྱེད་སེང་གེའི་བླ་མ་དེ་དག་ལ། །ལུས་ངག་ཡིད་གསུམ་ཡོ་བྱད་ཅི་ནུས་དབུལ། །གུས་པར་ལྡན་པས་དེ་འདྲ་ཡང་དང་ཡང་། །བཙལ་ཏེ་བསྟེན་ཅིང་བསྙེན་བཀུར་རབ་ཏུ་འབད། །ཞེས་བརྡའི་སྒོ་ནས་གསུངས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །སྔོན་རྒྱ་གར་ལྷོ་ཕྱོགས་ཀྱི་རྒྱུད་ན། །ས་རམ་བྷེ་ར་བ་འཇིགས་བྱེད་གཞད་པ་ཞེས་བྱ་བའི་དུར་ཁྲོད་ཆེན་པོ་གཅིག་ཡོད་དེ། །ལྷ་དབང་ཕྱུག་ཆེན་པོས་བྱིན་གྱིས་བརླབས་པ་ཡིན་ཏེ། དེ་ན་ནང་པ་སངས་རྒྱས་པ་དང་། ཕྱི་པ་མུ་སྟེགས་པའི་མཁའ་འགྲོ་མ་རྣམས་དུས་བཟངས་ལ་རེ་མོས་ཀྱིས་ཚོགས་ཀྱིན་རྟག་ཏུ་ཚོགས་འཁོར་བྱེད་པ་ལགས་སྐད། །རྣལ་འབྱོར་གྱི་དབང་ཕྱུག་ཏེ་ལོ་པ་བྱ་བ་དེ་ནུབ་ཕྱོགས་སོ་མ་པུ་རིའི་གཙུག་ལག་ཁང་དུ་ལོ་བཅུ་གསུམ་ལྕགས་སུ་བཅུག་ནས། དེའི་ལྕགས་འོག་ཏུ་བསྒྲུབ་པ་མཛད་ནས། 
1-1-40a
ཐུགས་དམ་གྱི་དཀྱིལ་འཁོར་ཞལ་གཟིགས། འབྱུང་བ་སྐྱེ་མཆེད་ལ་དབང་ཐོབ་པས། །ཐུན་མོང་གི་དངོས་གྲུབ་བརྙེས་ཏེ། སྤྱོད་པ་ལ་གཤེགས་པ་བཞེད་པ་ལ། །མ་དང་མཁན་པོའི་ངག་བཅག་ཏུ་མི་རུང་སྙམ་ནས། ཉའི་རྣམ་ཤེས་ནམ་མཁའ་ལ་སྤྲུལ་པའི་རྫུ་འཕྲུལ་བསྟན་ནས། བཟོད་དགེ་འདུན་རྣམས་ཀྱིས་གྲུབ་པ་ཐོབ་པར་ཤེས་ནས། ཁོ་རང་ཅི་བདེ་བར་བཏང་བས། རྒྱ་གར་ལྷོ་ཕྱོགས་ཀྱི་རྒྱུད་དུ་བླ་མ་ན་གརྫུ་ན་ཚོལ་དུ་ཕྱིན་པས། ས་ལམ་བྷེ་ར་བ་འཇིགས་བྱེད་བཞད་པའི་དུར་ཁྲོད་དུ། བརྟུལ་ཞུགས་ཀྱི་སྤྱོད་པ་མ་ཏང་གི་སྤྱིལ་པོ་ན་བཞུགས་པ་དང་འཇལ་(མཇལ་)ནས། དེར་བླ་མ་ན་གརྫུ་ནའ་བཞུགས་སམ་དྲིས་པས། །ཁོང་ན་རེ་བླ་མ་དྲི་ཟའི་རྒྱལ་པོ་ལ་ཆོས་བཤད་དུ་གཤེགས་ནས་མེད། སྐྱེས་བུ་ཁྱོད་རྗེས་སུ་འཛིན་ཅིང་འབུལ་བ་ལ་ང་བཏང་བ་ཡིན་ཟེར་ནས། དེར་མཎྜལ་ཕུལ་ནས་བླ་མར་བཟུང་སྟེ། དུས་དེ་ཉིད་དུ་དཔལ་གསང་བ་འདུས་པའི་དབང་བསྐུར་རྫོགས་པར་མཛད། སེམས་ཀྱི་དེ་ཁོ་ན་ཉིད་འདི་ལྟར་ཡིན་པས། དེ་ཉིད་ཀྱི་དོན་ལ་དུས་རྟག་ཏུ་མ་རྗེད་པར་བསྒོམས་ཅིག་(སྒོམས་ཤིག་)ཅེས་བསྡམས་ནས། རྒྱལ་རིགས་ཀྱི་ང་རྒྱལ་བཅག་པ་དང་། ལམ་གྱི་རྟོགས་པ་མངོན་དུ་བྱ་བའི་ཕྱིར་རྗེས་གནང་གིས་སྤྱོད་པའི་ལམ་བསྟན་པ། སྐྱེས་བུ་ཁྱོད་ཕར་སོང་ལ། འདི་ནས་ཤར་ཕྱོགས་བྷྃ་ག་ལའི་རྒྱུད། ས་ཚིགས་རིང་པོར་ཕྱིན་པ་ན། ཧ་རི་ཀེ་ར་ཟ་ཧོར་གྱི་གྲོང་ཁྱེར་ཆེན་པོ་ཅིག་ཡོད་དེ། སྔོན་རྒྱལ་པོ་ཨུད་མ་ཀེ་སང་དེ་སྨྱོན་པའི་སང་དེ་ཞེས་བྱ་བས། སྤྲུལ་པའི་རྒྱལ་པོས་བྱིན་གྱིས་བརླབས་པའི་ཡུལ་ཁམས་ཡིན་པས། རང་བཞིན་གྱིས་གྲུབ་ཐག་ཉེ་ཞིང་། ལམ་བགྲོད་པ་མྱུར་བ་ཡིན་ཏེ། །གྲོང་ཁྱེར་དེའི་དབུས་ན་པ་ཉ་ཙ་པ་ཏ་ན་
1-1-40b
འདོད་ཡོན་ལྔ་འཛོམ་པའི་ཚོང་འདུས་ཡོད་དེ། དེ་ན་དྷ་རི་སྨད་འཚོང་མ་གཡོག་འཁོར་མང་པོ་དང་བཅས་པ་ཡོད་པས། །དེའི་གཡོག་གྱིས་ལ་ལམ་གྱི་རྟོགས་པ་སྦྱོངས་ཅིག །རིང་པོ་མི་ཐོགས་པར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་ལ། འགྲོ་བ་མང་པོ་ཡང་སྒྲོལ་བར་འགྱུར་རོ་ཞེས་ལུང་བསྟན་པ་མཛད་དེ། རྣལ་འབྱོར་གྱི་དབང་ཕྱུག་དེས་ཀྱང་བླ་མའི་བཀའ་བཞིན་དུ་བསྒྲུབས་ཏེ། མཚན་བཞིན་སྨད་འཚོང་མ་དེའི་སྐྱེས་པ་འགུགས་པ་དང་། སྐྱེལ་བའི་རོགས་བྱེད་ཅིང་། ཉིན་བཞིན་ཏིལ་བརྡུངས་པའི་རོགས་བྱེད་པ་ལས། ཅི་ཞིག་ལྟར་ལ་ཏིལ་གྱི་ལས་ལ་བརྟེན་ནས། གནས་ལུགས་དེ་ཁོ་ན་ཉིད་ཀྱི་རྟོགས་པ་མངོན་དུ་གྱུར་ཏེ། ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པ་ལས། གྲོང་ཁྱེར་པ་རྣམས་ཀྱིས་མཐོང་ཚུལ་ཐ་དད་པ། ལ་ལས་ནི་མེ་སྤུང་གཅིག་ལ་མར་མེ་བཅུ་བཞིས་བསྐོར་བར་མཐོང་། ལ་ལས་ནི་འོད་ཀྱི་ཕུང་པོ་གཅིག་གི་ནང་ན་དགེ་སློང་གཅིག་མཉམ་གཞག་ལ་བཞུགས་པར་མཐོང་། །ལ་ལས་ནི་རྣལ་འབྱོར་པ་དུར་ཁྲོད་ཀྱི་ཆས་ཀྱིས་བརྒྱན་པ་གཅིག་ལ་བུ་མོ་མང་པོས་ཕྱག་དང་བསྐོར་བ་བྱེད་པར་མཐོང་ནས། དྷ་རི་མོ་ལ་བསྙད་དེ། ཁྱོད་ཀྱི་གཡོག་པོ་དེ་གྲུབ་ཐོབ་དུ་(ཏུ་)འདུག་པ་ལ། ཁྱོད་ཀྱིས་སྡིག་པ་མང་པོ་བསགས་ཞེས་སྨྲས་པ་ལས། མོ་ཡིས་ནང་མ་གཅིག་ལྟར་ཕྱིན་པ་ལས། མདུན་གྱི་ནམ་མཁའ་ལ་འོད་ཕུང་གཅིག་གི་ནང་ན། རྒྱལ་པོ་རོལ་པའི་ཆ་བྱད་དུ་བཞུགས་ནས། ཕྱག་ཡ་བ་གཅིག་གིས་སྟུན་ཤིང་ལྷུང་ཐབས་སུ་བསྐྱུར་ཞིང་། ཏིལ་འདྲུ་བ་མཐོང་བ་ལས། ནང་དུ་སྤྱན་དྲངས་ཏེ། ཕྱག་དང་བསྐོར་བ་བྱས། ཞབས་སྤྱི་བོར་བླངས། རིན་པོ་ཆེའི་མཎྜལ་ཕུལ། རྗེ་བཙུན་ཁྱེད་གྲུབ་ཐོབ་ཏུ་བཞུགས་པ་ལ་
1-1-41a
ངས་ངོ་མ་ཤེས་ནས། སྔ་མ་ཡང་སྡིག་པ་མང་པོ་བསགས་པས་བཟོད་པར་བཞེས་འཚལ། ད་ཕྱིན་ཆད་རྗེས་སུ་བཟུང་བར་ཐུགས་རྗེས་བསྐྱབ་འཚལ་ཞེས་གསོལ་བ་བཏབ་པ་ལས། རྣལ་འབྱོར་གྱི་དབང་ཕྱུག་དེའི་ཞལ་ནས། ཁྱོད་ཀྱིས་ང་ལ་གང་ཟག་དམ་པར་ཆ་ཡོད་བཞིན་དུ་ལས་བཅོལ་པ་མ་ཡིན་པས། ཁྱོད་ལ་ཉེས་པ་མི་འོང་། ང་ལས་དེ་ལ་བརྟེན་ནས་ལམ་གྱི་རྟོགས་པ་སྦྱོང་བ་ཡིན་པས། ད་ལྟ་ངའི་རྒྱུད་ལ་སྐྱེས་པའི་ཆོས་ཐམས་ཅད་ཀྱི་རང་བཞིན་སྐྱེ་བ་མེད་པ་གཉུག་མ་ལྷན་ཅིག་སྐྱེས་པའི་ཡེ་ཤེས་དེ་ཁྱོད་ཀྱི་སྙིང་ལ་ཞུགས་པར་གྱུར་ཅིག །ཅེས་གསུངས་ཏེ། མེ་ཏོག་སྤྱི་བོར་བཞག་པ་ཙམ་གྱིས་སྐད་ཅིག་མ་དེ་ཉིད་ལ་མ་རིག་པའི་སྒྲིབ་གཡོགས་མཐའ་དག་དང་བྲལ་ནས། ས་དང་པོའི་བདེན་པ་མཐོང་ཞིང་། བྱིན་གྱིས་བརླབས་ཀྱིས་ལམ་ལ་སྣང་བ་སྐྱེས་པའི་རྣལ་འབྱོར་མར་གྱུར་ཏེ། དུས་དེ་ཙ་ན་རྒྱལ་པོའི་སྙན་དུ་སྤྲུལ་པ་པོའི་རྣལ་འབྱོར་པ་ཅིག་གིས། བྱིན་གྱིས་བརླབས་པ་ཙམ་གྱིས་དྷ་རི་མ་གྲུབ་པ་ཐོབ་པར་གྱུར་ཏོ། །བྱ་བ་གསན་ནས། ཡུལ་དེའི་རྒྱལ་པོ་གླང་པོ་ཆེ་ལ་བཅིབས་ཏེ། འཁོར་འབུམ་མང་པོ་དང་བཅས་པས། རྣལ་འབྱོར་པ་དེའི་ཞལ་གཟིགས་སུ་བྱོན་པས། བླ་མས་རྒྱལ་པོ་སྤྲོ་བ་བསྐྱེད་པའི་སླད་དུ། རྣལ་འབྱོར་མ་དང་གཉིས་ཀས་ཚོང་འདུས་ཆེན་པོའི་སྲང་དུ་ཤིང་ཏ་ལ་བདུན་སྲིད་དུ་ནམ་མཁའ་ལ་འཕགས་ཏེ། ཚངས་པ་ཆེན་པོ་སྒྲ་དབྱངས་ཀྱི་ང་རོས་ལྟ་བ་རྡོ་རྗེའི་འགུར་(མགུར་)བཞེངས་པ། གང་ཞིག་སྙིང་པོར་གྱུར་པ་ཏིལ་གྱི་མར། །རྨོངས་པས་ཏིལ་ལ་ཡོད་པར་ཤེས་གྱུར་ཀྱང་། །རྟེན་ཅིང་འབྲེལ་འབྱུང་ཡན་ལག་མ་ཤེས་པས། །
1-1-41b
ཏིལ་མར་སྙིང་པོ་འབྱིན་པར་མི་ནུས་ལྟར། །ལྷན་ཅིག་སྐྱེས་པ་གཉུག་མའི་ཡེ་ཤེས་ཏེ། །འགྲོ་བ་ཀུན་གྱི་སྙིང་ལ་ཡོད་གྱུར་ཀྱང་། །བླ་མས་མ་མཚོན་རྟོགས་པར་མི་ནུས་སོ། །ཏིལ་བརྡུངས་ཕུབ་མ་བསལ་བར་གྱུར་པ་ལས། །ཏིལ་མར་སྙིང་པོ་ཕྱུང་བ་དེ་བཞིན་དུ། །བླ་མས་བསྟན་པ་དེ་བཞིན་ཉིད་ཀྱི་དོན། །ཏིལ་མར་བཞིན་དུ་འཇུག་པ་གསལ་བར་བྱ། །ཡུལ་རྣམས་འབྱེད་མེད་ངོ་བོ་ཅིག་(གཅིག་)ཏུ་གྱུར། །ཀྱེ་ཧོ་རིང་འགྲོག་ཏིང་དཔག་དཀའ་བའི་དོན། །དེ་ལྟ་ཉིད་དུ་གསལ་བ་ངོ་མཚར་ཆེ། །ཞེས་རྣལ་འབྱོར་གྱི་དབང་ཕྱུག་ཆེན་པོ་དེ་ཉིད་ཀྱིས་དྷ་རི་མོའི་ཏིལ་འདྲུ་བ་ལ་བརྟེན་ནས། དེ་ཁོ་ན་ཉིད་ཀྱི་ཡེ་ཤེས་མངོན་དུ་གྱུར་བའི་རྟོགས་ཚད་ཤར་བ་རྡོ་རྗེའི་འགུར་(མགུར་)དེ་སྐད་དུ་བཞེངས་ནས། །རྗེས་སུ་བསྙད་པའི་ཚིག་ལྷུག་པར་དཀྲོལ་ཏེ། བཀའ་སྩལ་པ། དོན་དམ་པ་ལ་མི་མཐུན་པའི་ཕྱོགས་སྤང་དུ་མེད། གཉེན་པོ་ཡེ་ཤེས་བསྐྱེད་དུ་མེད། ས་དང་ལམ་གྱི་རིམ་པ་བགྲོད་དུ་མེད། །འབྲས་བུ་མངོན་དུ་བྱར་མེད་དོ། །ཀུན་རྫོབ་ཏུ་ཆོས་ཐམས་ཅད་རྒྱུ་དང་འབྲས་བུ་ལ་རག་ལས་པ། ཏིལ་དང་ཏིལ་མར་གྱི་དཔེས་བསྟན་ཏེ། གཏུན་ཤིང་དང་སྐྱེས་བུའི་ལག་པའི་འདུ་བྱེད་ཀྱིས་བརྡུངས་པ་དང་བཅིང་བ་མ་བྱས་ན། མར་གྱི་དོན་བྱེད་མི་ནུས་ཏེ། དེའི་ཕྱིར་ན་རྒྱུ་གཅིག་ལས་མ་ཡིན། གཉིས་ལས་མ་ཡིན་ཏེ། ཐམས་ཅད་ཀྱང་རྟེན་འབྲེལ་གྱིས་(གྱི་)ནུས་པ་འཛོམ་པ་ལས་བྱུང་སྟེ། དེ་བཞིན་དུ་སེམས་ཅན་ཐམས་ཅད་ཆོས་ཀྱི་སྐུ་ཡིས་ཁྱབ་ཀྱང་། བླ་མ་དམ་པས་མ་མཚོན་ཞིང་། ལམ་གྱི་རྟོགས་པ་མ་སྦྱངས་ན། འབྲས་བུ་སངས་རྒྱས་མངོན་དུ་མི་བྱེད་ལ། དེའི་ཕྱིར་ཀུན་རྫོབ་ཏུ་ཆོས་ཐམས་ཅད་རྒྱུ་དང་འབྲས་བུ་ལ་རག་ལས་པས། རྒྱལ་པོ་
1-1-42a
ཆེན་པོ་དེ་ལྟར་མཁྱེན་པར་མཛོད་ཅིག །ཅེས་བཀའ་སྩལ་པ་ལས། དུས་དེར་དེ་བཞིན་ཉིད་ཀྱི་སྒྲ་ཐོས་པ་ཙམ་གྱིས་རྒྱལ་པོའི་འཁོར་དུ་གཏོགས་པ་ཉ་ཙ་པ་ཏ་ན་འདོད་ཡོན་ལྔ་འཛོམ་པའི་ཚོང་འདུས་དེར་འཚོགས་པའི་མི་ཐམས་ཅད་ཀྱང་སྐད་ཅིག་མ་དེ་ཉིད་ལ་ཉོན་མོངས་པའི་འཆིང་བ་ཐམས་ཅད་ལས་གྲོལ་ནས། དེ་ཁོ་ན་ཉིད་ཀྱི་ཡེ་ཤེས་མངོན་དུ་གྱུར་ཏེ། མཁའ་སྤྱོད་ཀྱི་དངོས་གྲུབ་ཐོབ་ནས། དུས་ཅིག་ཏུ་ནམ་མཁའ་ལ་འཕུར་ཏེ། ཐང་གཅིག་ཤར་ཕྱོགས་ཟ་ཧོར་གྱི་ཡུལ་དེ་སྟོངས་པར་གྱུར་ཏོ། །ཡང་རྣལ་འབྱོར་གྱི་དབང་ཕྱུག་ཆེན་པོ་ཏེ་ལོ་པ་དེ་ཉིད་ཀྱི་ཕྱགས་ཕྱིར། དཔལ་ནཱ་རོ་པ་པཎ་ཌི་ཏ་ཆེན་པོས་ལོ་བཅུ་གཉིས་འབྲངས་ཏེ། དཀའ་བ་མི་འདྲ་བ་བཅུ་གཉིས་སྤྱད་པའི་རྗེས་ལ་སྣོད་ཀྱི་དྲི་མ་ཡོངས་སུ་དག་པར་གཟིགས་ནས། ལམ་མཆོག་ཏུ་གྱུར་པའི་རྟོགས་པ་བསྐྱེད་པའི་ཕྱིར། ཡེ་ཤེས་ཆེན་པོ་གཞན་འཇུག་གི་བྱིན་གྱིས་བརླབ་པ་མཛད་དེ། མཆིལ་ལྷམ་གདོང་པ་ལ་བརྒྱབ་པའི་དུས་སུ་སྔོན་ལ་ཆུ་བོ་དང་འདྲ་བའི་རྩ་དང་། རླུང་དང་བྱང་ཆུབ་སེམས་ལ་སོགས་པའི་མཚོན་བྱེད་བསྟན་ནས། མཚོན་བྱ་རྒྱ་མཚོ་དང་འདྲ་བའི་སྙུག་མ་ལྷན་ཅིག་སྐྱེས་པའི་ཡེ་ཤེས་ཀྱི་འགུར་(མགུར་)བཞེངས་པ། །ཀྱེ་ཧོ་འདི་ནི་རང་རིག་ཡེ་ཤེས་ཏེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏེ་ལོ་ང་ཡིས་ཅི་ཡང་བསྟན་དུ་མེད། །རང་གིས་རང་རིག་མཚོན་ཏེ་ཤེས་པར་བྱོས། །ཞེས་གསུངས་སོ། །རྗེ་བཙུན་ནཱ་རོ་པ་དེས། ཏཱཻ་ལོ་པ་ལོ་བཅུ་གཉིས་སུ་བསྙེན་བསྐུར་མཛད་ནས། དངོས་པོའི་གཞི་དེ་ཉིད་ཀྱི་བདེ་བ་ཆེན་པོའི་ཉམས་གཅིག་སྐྱེས་ནས། རྡོ་རྗེའི་འགུར་(མགུར་)བཞེངས་པ། །བླ་མ་གྲུབ་ཐོབ་རྣམས་ལ་ཕྱག་འཚལ་ལོ། །
1-1-42b
ཧཱུྃ་སྣང་བ་གཟུགས་ཀྱི་ཕུང་པོ་འདི། །སྐྱེ་བ་མེད་པའི་རང་བཞིན་ལས། །སྤྱད་དུ་ཡོད་ན་སྤྱད་རིགས་ཏེ། །མེད་པས་སྤྱད་དུ་འདོད་པ་ཅི། །རང་རིག་རང་གསལ་ཤེས་པ་འདི། །ཅི་ཡང་མེད་པའི་ཆོས་སྐུ་སྟེ། །གྲུབ་ན་ཞེ་འདོད་རིགས་པ་ལ། །གྲུབ་པ་མེད་པར་ཞེ་འདོད་ཅི། །སེམས་ཉིད་འོད་གསལ་སྟོང་པ་འདི། །སྒྲོ་བསྐུར་གཉིས་དང་བྲལ་བ་ལ། །སྐྱེས་ན་ཉམས་མྱོང་རིགས་པ་ལ། །མེད་པར་ཉམས་སུ་མྱོང་བ་ཅི། །ལྷུན་གྱིས་གྲུབ་པའི་བདེ་ཆེན་ནི། །དགེ་སྡིག་ཡོད་ན་བདེ་སྡུག་གཉིས། །འབྲས་བུ་འབྱིན་པར་རིགས་པ་ལ། །ཐམས་ཅད་མཉམ་པའི་ངོ་བོ་ལ། །དགེ་སྤྱད་སྡིག་པ་སྤང་པ་ཅི། །ཞེས་དྲིས་པས། ཏེ་ལོ་པས་ཤིང་ནྱ་གྲོ་ཏའི་སྟེང་ནས། ལན་བཏབ་པ་འདི་སྐད་དོ། །སྣང་བ་རྟེན་ཅིང་འབྲེལ་འབྱུང་འདི། །སྐྱེ་བ་མེད་པར་མ་རྟོགས་པར། །ཚོགས་གཉིས་ཤིང་རྟའི་འཁོར་ལོ་དང་། །འབྲལ་བར་མ་བྱེད་ན་རོ་པ། །སྐྱེ་མེད་སྟོན་པའི་རྗེ་བཙུན་དུ། །སྣང་བ་དཀར་དམར་ཤར་ཙ་ན། །ཤེས་པ་བྱ་རོག་རྫིངས་ལྟར་ཐོང་། །འདོད་ཡོན་སྤྱོད་ཅིག་ན་རོ་པ། །སེམས་ཉིད་རང་རིག་རང་གསལ་འདི། །སྣང་བ་འཕྲལ་བྱུང་མ་རྟོགས་ན། །ཞེན་པ་དང་བཅས་ཉམས་མྱོང་གིས། །བདག་ཉིད་འཆིང་འགྱུར་ན་རོ་པ། །འཁོར་བའི་མུ་མཐར་སྐྱེ་བ་ཡི། །རྣམ་རྟོག་གཟུང་འཛིན་སྣ་ཚོགས་འདི། །རྟོགས་པའི་སྟ་རི་རྣོན་པོ་ཡིས། །ཅི་སྣང་ཆོད་ཅིག་ན་རོ་པ། །འདོད་ཡོན་གཟུགས་སྒྲ་སྣ་ཚོགས་ལ། །སེམས་ཀྱི་ཞེན་པ་སྐྱེ་བ་ན། །སྦྲང་མ་རྩི་ལ་འབྱར་བ་འདྲ། །ཞེན་པ་ཐོང་ཅིག་ན་རོ་པ། །ལྟ་བ་བསྒོམ་པ་སྤྱོད་པ་གསུམ། །མཉམ་པར་རྟོགས་ན་དགེ་སྡིག་མེད། །གལ་ཏེ་རྟོགས་པ་གཞན་བྱུང་ན། །སྡེར་མེད་ཕྱིར་ན་རྨོངས་པར་ཟད། །སྐྱེ་མེད་སྤྲོས་དང་བྲལ་
1-1-43a
བ་ལ། །ཉམས་མྱོང་དྲན་རིག་གློ་བུར་འདི། །བརྫུན་པར་རྟོགས་ན་ཅི་དགར་སྤྱོད། །ཞེས་གསུངས་སོ། །ན་མོ་གུ་རུ། རྒྱ་གར་ལྷོ་ཕྱོགས་ཀྱི་རྒྱུད། པར་པ་ཏ་ཨ་ལང་ཀ་ར་ཞེས་བྱ་བའི་ཡུལ། རི་བོ་བྱ་རྐང་གི་དྲུང་དུ་རྗེ་ན་རོ་པས། སུ་རུ་པ་དང་། ཛྙ་གར་ཞེས་བྱ་བ་དང་། ལྷན་ཅིག་ཏུ་དབང་བསྐུར་ཞུས་པས། དེར་རྗེ་ཏེ་ལོ་པས་དཔལ་གསང་བ་འདུས་པ་ལྷ་སུམ་བཅུ་(ཅུ་)རྩ་གཉིས་རྟེན། གཞལ་ཡས་ཁང་དང་བཅས་པའི་སྤྲུལ་པའི་དཀྱིལ་འཁོར་དུ་དབང་བསྐུར་ཏེ། རྣལ་འབྱོར་ཙི་ན་མ་ཏྲི་དང་། ཉི་ན་མོ་རྫ་དང་། ཏ་མ་ལ་གསུམ། དུར་ཁྲོད་དགའ་བའི་མདངས་ན་གནས་པ་བརྡས་བཀུག་སྟེ། ཡེ་ཤེས་ལ་རོལ་པའི་སྤྱོད་པས། བདེ་བ་ཆེན་པོའི་སྐུ་ཉམས་སུ་བསྟར་ནས། རས་ཡུག་གཅིག་གི་སྣ་ལ་མེ་སྟག་གཅིག་ཕོག་པ་དང་། རས་ཡུག་དེ་ཐུལ་གྱིས་ཚིག་པ་དང་། དེས་མཚོན་པའི་བརྡར་གོ་སྟེ། དབང་གི་ཡེ་ཤེས་ཐུགས་སུ་ཆུད་དོ། །དེའི་དུས་སུ་རྗེ་ན་རོ་པས་འདི་ཞུས་ཏེ། བསྐྱེད་པའི་རིམ་དང་ལུས་དབེན་དང་། །དག་དབེན་སེམས་དང་སྒྱུ་མ་དང་། །འོད་གསལ་ཟུང་དུ་འཇུག་པའི་དོན། །འདི་དག་ཇི་ལྟར་མངོན་དུ་བྱ། །རིམ་ལྔ་གནད་ཅིག་ངེས་པ་ལ། །འདི་དག་ཇི་ལྟར་མངོན་དུ་བྱ། །ཞེས་ཞུས་པས། རྗེ་ཏེ་ལོ་པས་བརྡར་མཚོན་པའི་ཡེ་ཤེས་ལ་ཕྱེ་སྟེ་གསུངས་པ། ཧཱུྃ་སྣང་གྲགས་དཀར་དམར་དངོས་པོའི་ཚོགས། །ཕྱི་ན་རང་བྱུང་དཀྱིལ་འཁོར་ལ། །ཐམས་ཅད་ལྷ་དང་ལྷ་མོར་གསལ། །བསྐྱེད་རིམ་བསྒོམ་མེད་ན་རོ་པ། །རང་ལུས་གདོད་ནས་དག་པའི་སྐུ། །རྣམ་པར་དག་ཅིང་བདག་མེད་པ། །རྟེན་འབྲེལ་ཚོགས་པའི་སྣང་བ་ལ། །ལུས་དབེན་ཞེས་བྱ་ནཱ་རོ་པ། །བརྟན་གཡོའི་དངོས་པོ་མ་ལུས་པ། །ཐམས་ཅད་རླུང་གིས་བྱེད་པ་སྟེ། །བརྗོད་
1-1-43b
མེད་འབྲུ་གསུམ་རྡོ་རྗེའི་སྒྲར། །ངག་དབེན་འགྲུབ་བོ་ནཱ་རོ་པ། །རྣམ་པ་མ་འགགས་ཀུན་རྫོབ་ཏུ། །སྒྱུ་མའི་ལུས་སུ་སྣང་བ་ནི། །བདེ་ཆེན་ཐ་མལ་ལུས་དག་པ། །སྒྱུ་ལུས་ཡིན་ནོ་ནཱ་རོ་པ། །དངོས་པོར་འཛིན་པའི་སྣང་བ་རྣམས། །ཐམས་ཅད་གཉིས་མེད་ཡེ་ཤེས་དང་། །ཅིག་(གཅིག་)ཏུ་བྱེད་པའི་བསམ་གཏན་ལ། །འོད་གསལ་ཞེས་བྱ་ན་རོ་པ། །ཆོས་རྣམས་ཐམས་ཅད་བསྡུས་པའི་དོན། །མཐར་ཐུག་རང་བྱུང་ཕྱག་རྒྱ་ཆེ། །རྡོ་རྗེ་འཆང་དུ་རོ་ཅིག་(གཅིག་)པས། །ཟུང་འཇུག་ཡིན་ནོ་ནཱ་རོ་པ། །གཞི་ལུས་སེམས་ཚོགས་པ་དྭངས་པ་ལ། །གཞི་ལ་སྦྱང་གཞི་རྣམ་པ་ལྔ། །དེ་ཉིད་ལམ་དུ་བྱེད་པས་ན། །རིམ་ལྔ་ཡོངས་སུ་རྫོགས་པའི་ཚུལ། །བསྡུས་པ་ཅིག་ཆར་བསླབ་པ་ཡིན། །བསྐྱེད་རིམས་ལྷ་རུ་བརླབས་པ་དང་། །ལུས་དབེན་དག་པའི་སྐུར་ཤེས་ཤིང་། །འབྲུ་གསུམ་རྡོ་རྗེའི་བཟླས་པ་དང་། །སྣང་བ་གསུམ་གྱིས་དམིགས་པར་བྱ། །རང་ལུས་སྒྱུ་མར་འཆར་བ་དང་། །དེ་ཉིད་སེམས་ནི་འོད་གསལ་འགྱུར། །ཟུང་འཇུག་སྐུ་གསུམ་དབྱེར་མེད་དུ། །མངོན་དུ་འགྱུར་རོ་ནཱ་རོ་པ། །ཅེས་གསུངས་པས། དོན་ཇི་ལྟ་བ་བཞིན་ཁོང་དུ་ཆུད་དེ། རྣལ་འབྱོར་པ་གཉིས་པོ་དང་བཅས་པས། ལྷག་པའི་ཡེ་ཤེས་ཐུགས་སུ་ཆུད་དོ།། །།
